Üzülərək bildirmək istəyirik ki, bu gün gecə saatlarında El ağsaqqalımız, "Kəpənəkçi Xeyriyyə Fondunun" Ağsaqqallar şurasının sədri, çox dəyərli ziyalımız Pünhan Mustafa oğlu Əfəndiyev dünyasını dəyişmişdir.

Belə dəyərli şəxslərin aramızdan əbədi ayrılması elimiz üçün ağır itkidir. Ailəsinə, əzizlərinə baş sağlığı veririk. Ruhu şad, məkanı cənnət olsun. 

Mərhum bu gün səhər saatlarında Kəpənəkçi qəbristanlığında torpağa tapşırılmışdır.

Gəlin El ağsaqqalımızın həyat yoluna qısa bir nəzər salaq.

Pünhan müəllim 20 avqust 1938-ci ildə dünyaya göz açmışdır. 1947-1957-ci illərdə Bolnisi rayonunun Arıxlı Kənd məktəbində orta təhsil, 1963-cü ildən isə S.M.Kirov adına Azərbaycan Dövlət Universitetində ali təhsilini davam etdirmişdir. Əmək fəaliyyətinə 1967-ci ildən başlayan Pünhan müəllim Bakı Dövlət Universitetində kafedra laborantı, baş müəllim, kafedranın dosenti kimi fəaliyyət göstərmişdir. Bitki morfologiyası, Botanika, Ali bitkilərin sistematikası, Azərbaycan florası, Geobotanika, Dekorativ bağçılıq və gülçülük fənlərini tədris etmişdir.

Bir çox Beynəlxalq seminar, simpozium, konfranslarda iştirak etmişdir.

"Bitki morfologiyasından metodiki göstəriş", "Vəlvələçay hövzəsinin bitki aləmi", "Bitki morfologiyası" kimi kitabların müəllifidir.

Biologiya elmləri namizədi və dosent idi.